العام خذت البيرق وصدت العقاب
يوم الرجال حلوقها من دون ريق
أسرجت شعري والجماهير الزهاب
وإسنادي بلاد وولد عم ورفيق
وحوّلت فالوادي وهو دونه ضباب
مدري ورى الوادي مطر ولاّ حريق
كم فارس وده يحوّل غير هاب
يستوحش الماخوذ لاشاف المضيق
أقدمت والفرسان ترتاب وتهاب
أجرّي الهيـّاب وأقزْ الطريق
ومثـّلت داري بالقصيد وبالجناب
من الشمال إلى العديد إلى العريق
ترابها بالحسّ ماحسّه تراب
وحزومها تسوى الزمرد والعقيق
ومثـّلت راية من تلين إله الرقاب
صليب راي وكفو وحجاجه طليق
ممشاه للعليا ذهاب بلا إياب
الشيخ ابو مشعل حمد علمً دقيق
ومثـّلت كل الشعب من شايب وشاب
بدو وحضر تاريخنا عزً عريق
ومثـّلت ربعً فالوغى مخلب وناب
مريّـةً تاريخنا ماهو لفيـق
حن مزبن اللي لايجار ولايثاب
وحن فزعة اللي ذودهم راحت وثيق
أقدامنا جبال وعمايمنا السحاب
وأمجادنا تشبه سهيل إلها بريق
ومثـّلت يام بكبرها والإنتساب
إلى بني همدان نجمً له شعيق
الله خلقنا سيلاً متونه هضاب
كل السدود يحطها حبً دقيق
شاركت متوكل على منشي الحقاب
وحزامي من الشعر والعدّة يضيق
وطرقت بيبان القواقي باب باب
وقدّمت ماشفتوا جميع إنه يليق
وحشمت أذانيكم عن سقاط الخطاب
ورقيت بأيديكم على قمة طويق
وعدت داري بالفخر قبل الكتاب
ووفيت بأمر الله بالعهد الوثيق
وسترت بأفعالي مزينـّة الخضاب
وقهرت عدواني ونومست الرفيق
ولطم بعيري شوط واحد للركاب
يقوم راس وينتهي ماهو زريق
ومن كف ابو خالد تسلمت النصاب
من كف من عينه على القمة تويق
شيخ يروم المجد ويروم الصعاب
خلـّى الشعر من نومة الغفلة يفيق
واليوم لاوالله شفت القاف شاب
صار الشعر كورة وكلً له فر يق
وضاع الهدد بين الحديا والغراب
وضاع الصهيل مكرّمين من النهيق
إلا الرجال اللي قصايدهم عذاب
اللي لها معنى بها حسً رقيق
لاتشعل الفتنة ولاتطرد سراب
ولايرقـّع مانقصها بالزعيق
بس العرب ماعاد تدري بالصواب
ماميّزوا ويش الزفير من الشهيق
من جاب ضيعة قيل شوفوا ويش جاب
انا اشهد انه جاب له معنى عميق
الذيب كانه ذيب يدرع فالذياب
يخلي الخرفان للضبع العويق
ماجيت انافس جيت دعماً للشباب
وفوزي دمه عاده على القمة يريق
محمد بن فطيس المري
موضوع: العام خذت البيرق 
الخميس 10 فبراير 2011, 11:30 pm
